Zdenek og Martina ákváðu að eiga lítið og persónulegt brúðkaup á Íslandi. Íslenska veðrið var hins vegar ekki með þeim í liði en það stoppaði þau þó ekki að eiga yndislega upplifun með nánustu fjölskyldu sína sér við hlið.
Parið ætlaði að gifta sig í Reynisfjöru en vegna veðurs breyttust þau plön.
„Zdenek og Martina trúlofuðust við Dyrhólaeyjarvita í ágúst 2017 og vissu það strax að þau vildu gifta sig á Íslandi. Ég byrjaði að tala við þau í gegnum tölvupóst í janúar. Við eyddum mánuðum að skipuleggja daginn í gegnum tölvupóst og FaceTime til að tryggja að dagurinn þeirra yrði eins og þau vildu. Zdenek og Martina búa í Prag og ég bý í Texas, þannig samskipti var lykillinn,“ segir Nicole Thomson, ljósmyndari hjónanna, í samtali við IntimateWeddings.com
„Upphaflega ætluðu þau að gifta sig á svörtu ströndinni í Reynisfjöru, en veðrið var of slæmt. Vindurinn og öldurnar eru oft of sterkar til að Reynisfjara sé örugg, þannig þennan dag var hún lokuð!“
Nicole sá litla kirkju nálægt fjörunni og stakk upp á því að parið myndi gifta sig fyrir framan kirkjuna og þannig skýla sér frá vindinum. „Athöfnin var mjög stutt og köld, svo fóru þau að borða með fjölskyldu sinni á Suður-Vík.“
Vegna veðurs var brúðkaupsmyndatökunni frestað um einn dag. „Við tókum myndir á norður og norðurvestur hluta Íslands,“ segir Nicole. „Ég elskaði að geta stoppað til hliðar á vegum þar sem engir túristar voru til að skoða og taka myndir. Þetta var draumur miðað við túristasvæðin á Íslandi.“
Fimm gestir voru viðstaddir brúðkaup Martinu og Zdenek. Foreldrar þeirra og dóttir Zdenek. Ferðalagið og brúðkaupið kostaði samtals um eina milljón krónur.
IntimateWeddings.com spurði hjónin út í brúðkaupið á Íslandi. Þau sögðu að það erfiðasta við að gifta sig erlendis væri öll pappírsvinnan til að gera hjónabandið löglegt í heimalandi sínu.
Aðspurð hvað stóð upp úr á brúðkaupsdaginn segir Martina: „Klárlega veðrið! Ég held við munum aldrei gleyma veðrinu á brúðkaupsdaginn okkar því það var mjög kalt, mikill vindur og rigning. Við gátum ekki gift okkur á svartri ströndinni eins og okkur langaði vegna veðurs,“ segir Martina. „Við þurftum að taka myndirnar daginn eftir vegna veðursins.“