61 árs gömul kona að nafni Cecile Eledge fæddi ömmubarnið sitt á sjúkrahúsi í Nebraska í Bandaríkjunum þann 25. mars síðastliðinn. Barnið, litla hnátan Uma Louise, er dóttir sonar Cecile, Matthew Eledge, og maka hans, Elliot Dougherty. Cecile fór í tæknifrjógvun með eggjum úr systur Elliots til að sonur sinn og elskhugi hans gætu átt barn saman.
Það kom Cecile á óvart að hún gæti gengið með barn komin á þennan aldur. Matthew og Elliot segja í samtali við Buzzfeed að þeim hefði fundist mjög erfitt að borga ókunnugri manneskju til að ganga með barnið sitt.
„Við trúum því líka að það þurfi þorp til að ala upp fjölskyldu,“ segir Matthew. „Við fórum kannski óhefðbundna leið en við gátum talað um ferlið og það gerði þetta svo spennandi og skemmtilegt.“
Elliot segir að hann og Matthew hafi dreymt um að eignast barn lengi en að þeir hafi fyrst talið það vera gerlegt þegar að systir Elliots, Lea Yribe, hafi boðist til að gefa þeim egg.
„Það gaf okkur stökkpall til að stofna fjölskyldu. Hún var með í þessu alveg frá byrjun,“ segir Elliot. Til að búa til barnið var sem sagt sæði Matthews og egg Leu notað og komið fyrir í legi Cecile, móður Matthews, með tæknifrjóvgun. Cecile segist hafa passað sig meira á þessari meðgöngu en þegar hún gekk með sín eigin börn og drakk ekki einu sinni kaffi þessa níu mánuði.
„Mér hefði liðið hræðilega ef eitthvað hefði gerst,“ segir hún. „Ég fylgdi öllum ráðleggingum í einu og öllu.“
Það var svo í síðustu viku sem litla hnátan kom í heiminn, heilbrigð og ellefu merkur. Matthew og Elliot eru í skýjunum og þakklátir fyrir að eiga svona gott fólk í kringum sig sem gerði þetta mögulegt.
„Sem hommar erum við heppnir að eignast barn á tímum þar sem fólk fagnar sambandi okkar og að við séum foreldrar, og einnig á tímum þar sem tæknin leyfir okkur að eignast barn sem hefur genablöndu Elliots og mín,“ segir Matthew, en þeir Elliot búast við því að Uma litla verði algjör díva eins og feðurnir.
„Hún er með svo margar stórkostlegar konur til að líta upp til.“