„Núna þarf þessi blessaði táningur að fara að flytja út. Hann er ósköp venjulegur unglingur sem sefur á daginn og vakir á nóttunni, sem er örugglega tölvuleikjum að kenna. Hann draslar til, brýtur hluti og hendir niður hlutum ef honum leiðist.“
Svona hefst auglýsing Ágústu Kolbrúnar þar sem hún óskar eftir leiguhúsnæði fyrir unglinginn á heimilinu. Heldur hún áfram og segir:
„Hann rífur kjaft og hundsar allt sem hann er beðinn um að gera. Hann borðar endalaust en er samt roooosalega matvandur. Hann á eflaust ekki eftir að borga leigu og stingur af ef þú ætlar að reyna að rukka hann. Ég held að hann haldi líka fullt af partýjum þegar ég er ekki heima. Ég veit ekki til þess að hann sé í einhverju rugli samt. Hann neitar alltaf.“
Segir Ágústa unglinginn þó ávallt vera snyrtilegan til fara og að hann hugsi vel um sjálfan sig.
„Á enginn huggulegan stað fyrir þetta gerpi? Kassa, sófa, rúm, hillur, gólfið jafnvel? Hann er rosa nægjusamur.“
Fyrir neðan auglýsinguna birtir Ágústa svo mynd af unglingnum sem um ræðir:
Tekur hún það þá fram að hann sé í raun alls ekki að leita.
„Hann fær að vera hjá okkur lengur. Við lentum bara í rifrildi því hann vildi ekki gera það em ég bað hann um og hann trúði mér ekki að ég myndi henda honum út. Sem ég er svo sem ekkert að fara að gera,“ segir hún að lokum. Auglýsingin hefur vakið mikla lukku enda bráðfyndin. Ágústa gaf DV góðfúslegt leyfi til þess að deila henni með lesendum.