Eins algengt það telst að kona fæði barn í heiminn þá upplifir hver og ein kona sína fæðingu á einstakan hátt. Margar konur eiga erfitt með að útskýra tilfinningarnar á bak við fæðinguna enda má segja að þær séu mikil blanda af bæði sársauka og gleði.

Það eru líklega fáar konur sem hugsa um neitt annað en að anda sig í gegnum verki og finna sér almennilega stöðu til þess að vera í þegar komið er að lokasprettinum í fæðingu. En ljósmyndarinn Megan Mattiuzzo var ákveðin í því að taka myndir af augnablikinu þegar sonur hennar Easton kom í heiminn. Samkvæmt Metro höfðu vinir ljósmyndarans boðið henni að taka myndirnar fyrir hana en tók hún það ekki í mál og vildi hún sjálf ná augnablikinu á filmu þegar sonur hennar tæki fyrsta andardráttinn.

Staðsetti Megan myndavélina ofan á maga sínum og tókst henni með því að ná ótrúlegum myndum af því þegar sonur hennar kom í heiminn og ljósmæðurnar lyftu honum upp. Megan upplifði miklar og vondar hríðar og fékk hún mænudeyfingu sem virkaði ekki sem skyldi. Eiginmaður hennar var því með myndavélina við hönd megnið af tímanum en rétti Megan hana rétt áður en barnið kom í heiminn.

„Ég vildi ná einni mynd frá mínu sjónarhorni og ég vildi að það yrði mynd af fyrsta andardrætti sonar míns,“ sagði Megan.

„Ég hætti að einblína á verkina. Þetta er sonur minn, barnið mitt. Að sjá hann.. Ég get ekki útskýrt tilfinninguna. Þú gengur með barn í níu mánuði og veist ekki hvernig það mun líta út og hver þau eru. Og að sjá síðan heilbrigt barn, það hellist yfir mann hamingja.“

Um leið og Megan var búin að taka myndirnar rétti hún eiginmanni sínum myndavélina svo hún gæti fengið son sinn beint í fangið.