Á dögunum stofnaði Heiða Rut Tómasdóttir nýjan og skemmtilegan hóp á Facebook sem kallast „Getur þú betur?“ Markmið síðunnar er að fólk geti deilt myndböndum af leyndum hæfileikum sínum og borið þá saman við aðra.
„Ég fékk þessa hugmynd rétt áður en ég var við það að sofna og það er sagt að þá komi bestu hugmyndirnar þannig að ég ákvað að skrifa þetta niður svo ég myndi ekki gleyma henni. Síðar komst ég að því að það er ekki til sambærileg síða á Facebook, allavega ekki á Íslandi. Síðan er ætluð til skemmtunar og til þess að uppgötva hæfileika hjá fólki í öllum aldurshópum. Einnig eru gæludýr líka velkomin með sína hæfileika,“ segir Heiða í samtali við DV.
„Þetta virkar eins og hæfileikakeppni og fólk getur valið sér myndband af síðunni til þess að reyna að gera betur. Þess vegna heitir síðan Getur þú betur?“
Síðan Heiða stofnaði síðuna hafa þó nokkur myndbönd birst á síðunni og vonast Heiða til þess að enn þá fleiri vilji taka þátt. Segist hún hafa margar góðar hugmyndir sem henni langar að framkvæma síðar og hvetur hún sem flesta til þess að skrá sig á síðuna til þess að sína hæfileika sína.
„Því fleiri því skemmtilegra verður að fylgjast með og því fleiri hæfileikar uppgötvast.“
