Ef þú varst í vandræðum við að finna þér öskudagsbúning í ár þá erum við búin að finna lausnina fyrir þig næsta ár. Það er að segja ef þú átt kött.
Nú hefur fyrirtæki frá Japan hafið framleiðslu á grímu eða réttara sagt höfuðfati sem gert er eftir útliti katta og ekki bara einhverjum ketti, heldur nákvæma eftirlíkingu af þínum ketti. Metro greinir frá því að fyrirtækið á bak við hönnunina hafi ákveðið að nefna sig „My family“ eða fjölskyldan mín sem er alveg ágætis nafn svona fyrst þú ert að reyna að sannfæra köttinn þinn um að þú sért einn af þeim.
Fyrirtækið sem er virkilega stolt af sinni vinnu, hefur meira að segja leyft fólki að sjá hvernig vinnslan á kattarhöfðinu fer fram. Þar má sjá hvernig þeir endursköpuðu höfuðið á Bengali kettinum Rui sem býr í Kyoto. Rui er virkilega sætur köttur en við vitum ekki alveg hvað okkur á að finnast um þessa útgáfu af honum (og hann greinilega ekki heldur.)
Já, allt er nú til segjum við bara.