Erna Kristín er með mikilvæg skilaboð fyrir sumarið. Erna Kristín er þekkt fyrir að dreifa boðskap um jákvæða líkamsímynd og hampra á því að allir líkamar eru fallegir, sama hvernig þeir eru. Hún heldur úti vinsælum Instagram aðgangi, @ernuland, þar sem hún deilir myndum og öðru efni tengdu jákvæðri líkamsímynd.

Sumarið er oft tími sem gerir fólk stressað. Það fer í átak nokkrum mánuðum fyrr í leit að hinum fullkomna „bikiní líkama.“ En Erna Kristín segir að allir líkamar eru bikiní líkamar.

https://www.instagram.com/p/BulgzIug4sB/

„Ómægat það er að koma sumar og ég er enn með fellingar og linan maga! ☹“ eða „ómægat það er að koma sumar og ég er enn með fellingar og linan maga! ?“ Nákvæmlega sama setninginn nema sitthvor „emoji-kallinn“ sem algjörlega segir meira en þúsund orð,“ segir Erna Kristín.

„Með fellingar, með linan maga. Með sixpack og lærapoka. Með flatan rass og feitar hendur. Með kúlurass og stór læri. Mjó, feit, stór, lítil. Sumarið er ekkert að spá í þessu. Sólin hættir ekkert að skína, sjórinn þornar ekkert upp og ströndin breytist ekkert í megrunartöflur þótt fellingarnar mínar, flati rassinn og lini maginn gengur út í bikiníi og það sama á við um ykkur. Allt er á sínum stað, við höfum öll rými, allir líkamar eru bikiní líkamar. Náttúran setur engan standard á útlit. Bara það er fín staðfesting að þetta er og verður allt í lagi. Hvernig sem við erum í laginu.“

Erna Kristín gaf nýverið út bókina Fullkomlega ófullkomin sem hefur það markmið að fella niður óraunhæfar staðalímyndir. Bókina er hægt að fá í Eymundsson og Lindex.