Lucy Burrows ákvað að breyta til og pantaði sér tíma í klippingu. Hún ákvað, líkt og sniðugt er, að taka með sér mynd sem sýndi nákvæmlega hvernig hún vildi hárið klippt. Svona til að koma í veg fyrir misskilning.
Myndin sýndi nútímalegan og töff hárstíl þar sem hárið er rakað stutt í hnakkann með flottu mynstri.
Öðruvísi fór þó en áætlað var.
Klippingin sem hún fékk var engan veginn í samræmi við myndina og varð Lucy, vægast sagt, afar ósátt.
Hún segir að klippistofan hafi neitað, til að byrja með, að bæta henni upp klippinguna, en hún gafst þó ekki upp og að lokum fékk hún endurgreitt og 10 pund að auki, sem afsökunarbeiðni.
„Þau rústuðu hárinu á mér og sjálfstraustinu. Ég gat ekki einu sinni farið í vinnuna,“ segir Lucy í viðtali við Metro.
Góðu tíðindin eru þó að raksturinn var í hnakkanum svo Lucy getur greitt yfir mistökin. Klippingin var í ágúst en Lucy segir að fyrst núna sé klippingin farin að vaxa úr.
„Ég get ekki sett hárið á mér upp og það er bara svo ljótt og subbulegt. Eftir mikið rifrildi viðurkenndi klipparinn loksins að hann hefði gert mér þetta og endurgreiddi mér. En ég er enn hálfsköllótt, sem er ekki skemmtilegt.“