„Ég sakna íslenska fólksins, því ég verð alltaf Íslendingur í kjarnann og aðeins á Íslandi líður mér eins og ég sé heima. Ég hlakka mikið til að koma núna og verja nokkrum mánuðum í tökum á Íslandi og leyfa dóttur minni að fara í íslenskan leikskóla í smátíma. Svo held ég áfram ferðalaginu,“ segir leikkonan Aníta Briem í viðtali við Albumm.
Aníta er á leiðinni heim, eftir áratug í Los Angeles, til að leika aðalhlutverkið í sjónvarpsseríunni Ráðherrann, á móti Ólafi Darra Ólafssyni.
„Við erum nýbúin að ganga frá samningum svo það gleður mig mikið að segja frá því. Þar er Ólafur Darri í titilhlutverki en ég leik konuna hans, Steinunni. Sagan á sér stað í íslenskri pólitík, sem er auðvitað alveg einstök. Margt ótrúlega dínamískt getur gerst í íslenskri pólitík af því að, jú við erum Íslendingar og ekki alveg eins og fólk er flest! Það sem að heillaði mig ómælandi mikið er ástarsagan á milli þeirra hjóna. Við Ólafur Darri lásum handritið í fyrra sumar og segja má að ég sé mjög spennt að vinna með þessum dásamlega leikara. Þetta verður krefjandi og djúsí og ég gæti ekki verið glaðari,“ segir leikkonan knáa.
Nýjasta mynd Anítu, The Drone, var frumsýnd á Slamdance-hátíðinni nýverið.
„Þetta er spennutryllir sem við tókum upp fyrir um tveimur árum og er frekar lítil indie-mynd en ég hef reyndar ekki séð hana. Ætli ég sé ekki eitthvað að draga lappirnar, því þetta er fyrsta myndin þar sem ég var beðin um að vera í bikiní, þó í nafni kómedíu svo það var aðeins skárra. Það gæti verið að ég horfi aldrei á hana, nei ég segi bara svona. Ég leik svona klassískan vandræðagemsa svolítið „homage” til 80´s gamanmyndanna eins og Fast Times at Ridgemont High,“ segir Aníta, en hún var dugleg að hreyfa sig til að undirbúa sig fyrir hlutverkið.
„Vandamálið er að því flottari sem stelpan er, því meira vesen er það fyrir aðalpersónurnar og því áhugaverðara og fyndnara. Svo ég „panikaði“ auðvitað og djöflaðist í ræktinni til að komast á einhvern ásættanlegan stað, sem var svo frábært fyrir mig persónulega af því ég fann í fyrsta skiptið alvöru takt við ræktina og nýt ennþá góðs af þeim hamingjuhormónum sem fylgja því að stunda líkamsrækt. Svo ef ég bráðna niður í gólf af feimni og vandræðileika við að horfa á sjálfa mig í bikiní, hugsa ég bara, en takk samt fyrir að kenna mér að elska ræktina!“
