Glamúrfyrirsætan, þyrluflugmaðurinn og athafnakonan Ásdís Rán Gunnarsdóttir mætti í Harmageddon á X-inu í morgun til að ræða allt milli himins og jarðar, þá helst rómantík þar sem Valentínusardagurinn er á morgun.
„Konur elska blóm og náttúrulega demanta og skartgripi og ýmislegt,“ sagði Ásdís Rán. „Það er alltaf jafn viðeigandi. Ég verð að segja það.“
https://www.instagram.com/p/BtEuxUIgxdl/
Viðhorf Ásdísar Ránar til kynjahlutverka hafa vakið gríðarlega athygli, þá sérstaklega eftir að viðtal við hana í DV birtist seint á síðasta ári þar sem hún sagði að jafnréttisbaráttan hefði gert íslenska karlmenn að kerlingum. Ásdís Rán sagði í viðtalinu við Harmageddon að konur vildu blóm og gaf lítið fyrir þær útskýringar þáttarstjórnandanna Frosta og Mána að ný kynslóð kvenna væri komin upp sem vildi hugsanlega frekar bækur en skart og rósir.
„Ég held að það sé bara bull. Ég tek ekki þátt í svoleiðis. Þessir nýju kvenskörungar, eruð þið að tala um það? Nei, ég held að allar konur vilji gjafir og rómantík, þó þær séu rauðsokkur eða femínistar eða hvað sem það er,“ sagði Ásdís Rán. Þá ítrekaði hún þá skoðun sína að karlmenn eigi að vera karlmannlegir.
https://www.instagram.com/p/BqMtcexA_w2/
„Mér finnst karlmennska heillandi. Ég styð ekki þetta jafnrétti sem er komið núna í tísku. Ég vil bara hafa karlinn karlmannlegan og ég vil bera virðingu fyrir honum. Þessi gömlu gildi að karlinn sé svolítill bossi. Mér finnst það sexí. Mér finnst ekki sexí að deila og að konurnar séu að borga fyrir mennina,“ sagði hún og hélt áfram.
„Mér finnst mikilvægt að karlmenn fái að halda í þessa karlmennsku. Mér finnst þeir vera að deyja út sem kynslóð. Þetta er orðið allt lekið saman. Karlarnir einhvern veginn, það er enginn tilgangur fyrir þá lengur. Þetta er rosa mikið á Íslandi. Þetta er ekki svona erlendis.“
Viðtalið við Ásdísi Rán í heild sinni má hlusta á hér að neðan, en það byrjar í kringum 44. mínútu.
