Samskipti hunda og katta hafa lengi verið til umfjöllunar. Reglulega eru gerðar bíómyndir um líf þeirra saman og hefur það iðulega verið sett fram þannig að kettirnir séu þeir sem ráða yfir hundunum.
Þessi tvö gæludýr eru algeng á heimilum hérlendis og á hún Delia Howser fimm labradora og tvo ketti.
„Chaplin er mikill höfðingi, allra manna hugljúfi og alveg einstakur kisi,“ segir Delia í samtali við Bleikt.
Blaðakona hafði samband við Deliu eftir að hafa séð skondna mynd af gæludýrunum hennar þar sem greinilega má sjá hver það er sem ræður á heimilinu.
„Tveir stórir Costco púðar. Fjórir Labradorar. Einn gamall köttur. Einfalt reikningsdæmi,“ segir Delia á síðunni Spottaði Kött.
Á myndinni má sjá köttinn Chaplin njóta lífsins á einum stórum púða á meðan tíkurnar Aska, Alba, Aþena og Salka hjúfra sig saman á sambærilegum púða.
„Rakkinn Púki og Nelson kisustrákur voru á kantinum. Nelson er sömuleiðis einstakur. Hann er var villikettlingur sem fannst hálf frosinn fyrir nokkrum árum í bátalóninu hér í Hafnarfirði. Svo eru allir hundarnir mínir yndislegir félagar. Sáu alfarið um að koma mér í gegnum lyfjameðferð við krabbameini. Drógu mig út í göngu alveg sama hvað.“