Ég er 25 ára gaur og á kærustu. Við erum búin að vera saman í nokkra mánuði og það gengur mjög vel. Við erum að spá í að byrja í sambúð fljótlega og þess vegna er ég að analísera allt í sambandinu þessa dagana því ég vil vera algjörlega viss. Það er næstum allt fullkomið, hún er falleg og skemmtileg og lætur mér líða mjög vel. Ég elska hana mjög mikið og mundi alls ekki vilja vera með neinni annarri.
Það er samt eitt atriði í kynlífinu sem ég er óöruggur með. Hún lokar alltaf augunum og stynur ferlega mikið. Mér finnst alltaf eins og hún sé að hugsa um einhvern annan gaur þegar hún gerir þetta. Ég hef spurt hana en hún segir að það sé alls ekki þannig, að sér þyki bara gott að gera þetta. Ég get samt ekki hætt að hugsa um þetta og er farinn að ímynda mér alls konar náunga sem hún er kannski að hugsa um, þar á meðal mína bestu vini. Ég skammast mín eiginlega fyrir að trúa henni ekki en veit ekki hvernig ég á að komast út úr þessu. Geturðu hjálpað?
Kveðja,
Ég
Halló Hannes
Veistu, það er alls ekkert óvenjulegt við það að kona loki augunum og stynji í kynlífinu. Sumum konum finnst betra að loka úti umheiminn til að geta betur einbeitt sér að því sem er að gerast í líkamanum og njóta kynlífsins og augnabliksins til fulls. Stundum er það jafnvel forsenda þess að konan geti fengið fullnægingu. Öndun, einbeiting og rétt áreiti er það sem skiptir flestar konur máli þegar kemur að því að fá fullnægingu. Þá er mikilvægt að snípur eða aðrir mikilvægir líkamspartar séu snertir á réttan hátt og að áreiti sem getur truflað sé útilokað. Þetta getur verið áreiti eins og hljóð úr umhverfinu (t.d. bílahljóð, barnahljóð, útvarpsfréttir eða hvað sem er annað) eða eitthvað sem sést, s.s. loftið í svefnherberginu sem þarf að mála eða meira að segja ástmaðurinn sjálfur. Hljómar kannski einkennilega en sumar konur eru ferlega viðkvæmar.
Ég held að þú ættir að treysta orðum kærustu þinnar. Ef hún segist ekki vera að hugsa um annan mann er engin ástæða fyrir þig að rengja það. Samband ykkar virðist traust og gott og hún hefur líklega enga ástæðu til að ljúga að þér.
Ég verð samt að minnast á að draumórar í kynlífinu eru afskaplega algengir bæði hjá konum og körlum og fyrir suma geta passlega dónalegar hugsanir verið bráðnauðsynlegar til að ná hámarksnautn, þ.e. fullnægingu. Stundum eru órarnir aðferð til að ná fyrrnefndri einbeitingu og loka sig inni í kynnautninni langt frá öllu daglegu amstri og áhyggjum. Ég er viss um að þú sjálfur hefur einhvern tíma látið hugann reika í kynlífinu… en það er ekki þar með sagt að þú elskir ekki kærustuna þína og það þýðir heldur ekki að þín heitasta ósk sé að vera á öðrum stað með annarri konu.
Með kærri kveðju, Ragga
