Bjarni Siguróli Jakobsson matreiðslumaður komst í gær áfram í Evrópuforkeppni Bocuse d´Or við hátíðlega athöfn í Turin á Ítalíu, en Evrópuforkeppni var haldin þar 11. – 12. júní. Mun Bjarni því keppa í hinni víðfrægu Bocuse d´Or sem haldin verður í Lyon í Frakklandi dagana 29. og 30. janúar 2019.
20 evrópuþjóðir kepptu í forkeppninni um 10 sæti í aðalkeppnina í Lyon í Frakklandi í janúar 2019. Tuttugu og fjórar þjóðir fá keppnisrétt í Lyon eftir að hafa unnið forkeppni í sinni heimsálfu.
Þessar tíu þjóðir komust áfram í gær:
1. sæti – Noregur
2. sæti – Svíþjóð
3. sæti – Danmörk
4. sæti – Finnland
5. sæti – Frakkland
6. sæti – Belgía
7. sæti – Sviss
8. sæti – Ungverjaland
9. sæti – Ísland
10. sæti – Bretland
Bjarni Siguróli er mikill keppnismaður en hann hreppti titilinn Kokkur Ársins 2012 og náði öðru sæti í keppninni Matreiðslumaður Norðurlanda 2013. Bjarni Siguróli hafði 5 ½ klukkustund til þess að matreiða forrétt og kjötrétt fyrir 20 dómara. Afraksturinn var sannkallað listaverk og var annars vegar borinn fram á fallegum viðarplötum og hins vegar á glæsilegu silfurfati. Allt gekk samkvæmt áætlun og voru Bjarni, aðstoðarmaður hans og þjálfari að vonum hæstánægðir með úrslitin.
Undirbúningur stóð yfir yfir í nokkra mánuði og rúmt tonn af eldhúsáhöldum og tækjum var sent til Turin. Þjálfari Bjarna er Viktor Örn Andrésson, bronshafi og Bocuse d´Or keppandi 2017, og aðstoðarmaður er Ísak Þorsteinsson.
Nú halda áfram strangar æfingar hjá Bjarna Siguróla en hann stefnir ótrauður á verðlaunapall í Lyon.
Hvert þátttökuland átti fulltrúa í dómarateymi Bocuse d´Or og var matreiðslumeistarinn Sturla Birgisson sem dæmdi fyrir hönd Bocuse d´Or akademíunnar á Íslandi, sem er hópur fyrrverandi keppenda sem heldur utan um þátttöku Íslands í keppninni.
Keppnin Bocuse d‘Or hefur verið haldin síðan 1987 en fyrsti Íslenski keppandinn tók þátt árið 1999. Það var Sturla Birgisson og náði hann fimmta sæti. Síðan þá hafa Íslendingar ávallt verið í níu efstu sætunum en besta árangri náði Hákon Már Örvarsson árið 2001 og Viktor Örn Andrésson árið 2017 þar sem þeir hrepptu bronsverðlaunin.
Fréttin birtist fyrst á Veitingageirinn.
