Í upphafi nóvember mánaðar greindi söngkonan Þórunn Antonía frá því að hún hyggðist loka síðunni Góða systir sem hún hefur haldið úti á samfélagsmiðlinum Facebook. Í dag birtir hún nýja færslu þess efnis að síðan muni halda áfram um ókominn tíma.
Síðan Þórunn birti færslu þess efnis að hún hyggðist loka síðunni hefur ringt yfir hana kærleiksríkum skilaboðum frá konum þess efnis að síðan hafi skipað stóran sess í hjörtum þeirra. Segist Þórunn hafa orðið ánægð að heyra það og að henni hafi þótt erfiðara en hana gunaði að ætla að eyða síðunni.
„Mér finnst erfiðara en ég hélt að hætta þessum hópi og gefast upp. Einnig hef ég lært í gegnum lífið að það er mikilvægt að hætta ekki þegar maður verður þreyttur eða vonlaus. Þá er einmitt málið að hvíla sig og leita til einhvers sem vill hjálpa. Ein kona sem ég lít mikið upp til og er að gera frábæra hluti að miðla sjáflsást og kærleika er Erna Kristín. Mig langar að gera hana að admin og sjá aðeins til til áramóta hvort við getum ekki gert eitthvað magnað með allan þennan fjölda kvenna. Það væri sannarlega synd að ýta bara á „eyða hnappinn,““ segir Þórunn í nýjustu færslu sinni á síðunni.
Erna Kristín hefur unnið mikið í því að efla sjálfsmynd fólks og í dag kemur bók Ernu, Fullkomlega ófullkomin út og verður hún með útgáfupartý í Lindex Kringlunni í kvöld klukkan 20:00 sem öllum er boðið að mæta í.
Bíður Þórunn Antonía hana Ernu velkomna sem stjórnanda síðunnar og vonast hún til þess að með hjálp Ernu verði síðan Góða systir langlífari.
