Hin þriggja ára Daisy Healy hefur heldur betur vakið athygli á skömmum tíma. Á dögunum dreifðist myndband af henni víða um veraldarvefinn þar sem hún tekur símaspjall við ímyndaðan vin sinn. Það er ekki frásögur færandi nema meirihluti þess sem hún segir tilheyrir talsmáta sem er sjaldan kenndur við þennan aldur.
Daisy er frá Dublin og hefur heillað marga með sláandi eftirhermu sinni af hinni dæmigerðu slúðurdrottningu. Faðir stúlkunnar stóðst ekki mátið að festa samtalið á myndband og má heyra í honum undir lokin áður en dóttirin lýkur símtalinu.
Í kjölfar útbreiðslu myndbandsins er Daisy komin með sína eigin YouTube-rás sem hefur hlotið heitið Crazy Daisy. Rásin var stofnuð fyrir viku síðan og eru þegar komin hátt í þrjátíu myndbönd af stúlkunni í hressum gír.