„Langvarandi niðurskurður í þjónustu fyrir fólk með fíknsjúkdóm, niðurskurður sem í dag getur ekki kallast neitt annað en fjársvelti, er án efa ein af ástæðum fyrir versnandi stöðu áfengis- og vímuefnasjúklinga, fjölgun ótímabærra dauðsfalla og biðlista sem brátt nær frá sjúkrahúsinu Vogi, alla leið niður í Skógarhlíð, þar sem ráðherrann og nefndir og ráð og stýrihópar sitja og reyna hugsa burt vandann eða bara leiða hann hjá sér,“ segir Arnþór Jónsson í pistli sínum á heimasíðu SÁÁ.
Sjúkrahúsið Vogur er umsvifamesta meðferðarstofnun landsins og þungamiðjan í starfi SÁÁ og í meðferð áfengis- og vímuefnasjúklinga í íslenska heilbrigðiskerfinu.
Á Vogi byrja flestir áfengis- og vímuefnasjúklingar meðferð, sem síðan er haldið áfram á meðferðarstöðvum SÁÁ og/eða göngudeild.
Á hverjum tíma eru um 130 sjúklingar, karlar og konur, á Vogi, Vík og Staðarfelli auk þess sem tugir manna sækja meðferð og stuðning á göngudeildir SÁÁ.
Á dögunum var stofnað til undirskriftasöfnunar þar sem skorað er á stjórnvöld að auka þegar í stað árleg framlög til sjúkrahússins á vogi um 200 milljónir til þess að útrýma biðlista eftir áfengis- og vímuefnameðferð.
Á sama tíma voru skipulagðir tónleikar sem haldnir verða í kvöld, þann 8. nóvember í Háskólabíói klukkan 20:00. Þeir sem koma fram á tónleikunum eru Ari Eldjárn, Baggalútur, Birnir, Bubbi, Elín Ey, Geisha Kartel, GDRN, Hjálmar, Jói P og Króli, KK, Myrra Rós, Páll Óskar, Svala Björgvins, Víkingur Heiðar Ólafsson, Þorsteinn Einarsson og Kári Stefánsson.
Ókeypis er inn á tónleikana sem eru ákall til stjórnvalda um að bjarga lífi þeirra sem eru í hættu.
Blaðakona DV tók viðtal við forstjóra Sjúkrahússins Vogs, hana Valgerði Á. Rúnarsdóttur, sérfræðing í lyflækningum og fíknlækningum um áhrif og aukningu fíkniefna á Íslandi ásamt fleiru. Við hvetjum fólk til þess að horfa á myndbandið, kynna sér stöðu SÁÁ, skrifa undir og mæta á tónleikana í kvöld.