„Öll þurfum við á von að halda. Án hennar erum við ekki að lifa lífinu til fulls. Við megum ekki missa af lífinu, það getur verið styttra en við gerum okkur grein fyrir. Ég gæti dáið á morgun, þú gætir dáið á morgun. Hver veit?
Vonin er mikilvæg. Ef við missum hana þá er úti um okkur. Auðvitað kemur það fyrir að maður missi vonina um tíma, eftir stór áföll sem dæmi. En við verðum að finna þessa litlu sjálfselsku sem er þarna innst inni bak við kílómetra af neikvæðum hugsunum,“ segir Agnes G. Sveinsdóttir í einlægri færslu sinni á Vynir.
Hlustum á þessa litlu rödd, hún er ekki að plata okkur, við eigum skilið að lifa og við eigum bara eitt líf.
Það vill engin taka sitt eigið líf. Ég held það að minnsta kosti. En þegar öll von er úti þá er oft erfitt að halda sér uppi og berjast áfram.
Ég hef sjálf upplifað það að vilja bara deyja. Sem betur fer þá talaði ég um það við vin minn og hann fór með mig á bráðamóttökuna og út frá því komst ég að hjá geðlækni, í lok tímans skrifaði læknirinn upp á kvíða og þunglyndislyf fyrir mig
Lyfin breyttu lífi mínu að vissu leyti, en það var aðallega það að ég fór að mæta í bæði hóp og einkatíma hjá stígamótum. Svo reyndi ég eftir bestu getu að hætta að tala niður til mín.
Mig hefur sem betur fer aldrei langað að deyja eftir þetta eina skipti. Ég vil lifa, ekki bara fyrir mig heldur líka fyrir barnið mitt, manninn minn, fjölskyldu og vini. Ég á bara eitt líf og ég ætla að lifa því til fulls.
Því miður eru allt of margir sem taka sitt eigið líf. Halda að lífið sé betra án þeirra. Það er það ekki. Það er yfirleitt ekkert hægt að gera til þess að fyrirbyggja sjálfsvíg oftast eru þetta manneskjur sem þig hefur engan grun um að líði eitthvað illa.
Þetta eru manneskjurnar sem fela tilfinningarnar sínar lang best af öllum og jafnvel brosa og hlæja allan daginn, auðvitað hefurðu engan grun um að þeirri manneskju líði illa.
Mig langar að biðja um að þú kæri lesandi, hugsir þig ekki tvisvar um ef þú hefur grun um að einhverjum líði illa, því þá er það oftast tilfellið. Hjálpaðu, talaðu, fáðu svör, gefðu svör eða leiðbeindu aðilanum í rétta átt. Stundum er bara nóg að gefa aðilanum knús og segja að það verði allt í lagi.
Bara plís ekki gera ekki neitt. Það er alltaf betra að vita að þú allavega reyndir, hvort sem það hjálpar eða ekki. Þú veist aldrei hvað morgundagurinn býður upp á.
Einnig ef þú kæri lesandi ert búin að missa vonina og langar til að yfirgefa þessa jörð, leitaðu þér aðstoðar strax. Þú ert ómissandi. Það þykir fólki vænt um þig.
Þú átt bara eitt líf.