Hæ!

Ég er 28 ára kona. Er búin að vera í sambandi við manninn minn í 3 ár. Fljótlega eftir að við byrjuðum að vera saman varð ég ófrísk og núna er annað á leiðinni. Ég hef undanfarið fundið fyrir svona leiða í kynlífinu eins og þetta sé orðið að skyldu t.d spyr maðurinn minn oft „er kynlíf í kvöld? “ og „ætlar þú í sturtu? “, sem er þá sama spurningin, þ.e. er kynlíf?

Mig langar ekki til að þetta sé svona fyrirfram ákveðið. Kynlífið hjá okkur endar líka alltaf með samförum en mig langar stundum til að kynlíf sé bara kossar og knús og jafnvel ekki inni í rúmi, en þá verður minn maður fúll.

Áttu ráð handa mér…? Líka hvaða leiðir er hægt að prófa til að þetta verði fjölbreyttara? Við eigum svolítið af leikföngum sem við notum stundum reyndar og líkar vel.

Takk fyrir,
Hulda

Heil og sæl Hulda

Kannski er ekki málið að hrúga inn leikföngum, nýjum stellingum eða kynlífi á óhefðbundnum stöðum. Kannski væri frekar vænlegt að huga að því hvernig þið lítið á kynlíf ykkar… þú ert greinilega gefin fyrir knús og kelerí en lýsir manninum þínum sem samfarasinna.

Ég held að fyrsta skrefið fyrir ykkur væri að ræða málin – ekki þegar pirringurinn ber þig (eða ykkur) ofurliði heldur einmitt þegar allt er í góðum gír á milli ykkar. Ef kona fer inn í svona umræður knúin áfram af pirringi er hætt við að allt lendi í ásökunum og sárindum í kjölfarið. Ef það er mjög erfitt fyrir ykkur að ræða hlutina og vinna í þessum málum legg ég til að þið leitið ykkur ráðgjafar hjá hlutlausum aðila.

Kær kveðja og gangi ykkur vel,

Ragga