Það er oft talað um það að tvíburar hafi sérstaka tengingu sín á milli sem annað fólk á erfitt með að skilja. Engan skal undra þessa sérstöku tengingu, hvað þá ef tvíburarnir eru eineggja en þegar það gerist verða tvíburarnir til úr nákvæmlega sama erfðaefninu. Einu eggi og einni sæðisfrumu, og eru þess vegna að miklu leyti eins.

Tvíburarnir Arnar Már og Ragnar Örn Ottóssynir eru báðir virkilega lífsglaðir, jákvæðir og hressir. Þeir hafa ávallt verið góðir vinir og í kringum þá er alltaf stutt í hláturinn.

Það var því ekki einfalt mál þegar Arnar, sem er að læra markþjálfun við Háskólann í Reykjavík, ætlaði að taka alvarlegt viðtal við Ragnar bróður sinn.

„Gleðin tekur alltaf yfir hjá okkur, sama hversu mikilvægt málefnið er, eða alvarlegt,“ segir Arnar í samtali við Bleikt.

Arnar ætlaði að taka viðtalið upp til þess að geta farið yfir það síðar en sama hvað bræðurnir reyndu þá tókst þeim ekki að halda andliti í gegnum samtalið.

„Þetta var skrautlegt alla leið. Við bara gátum ekki klárað samtalið.“

https://www.facebook.com/momentamo/videos/10217141451679287/

Arnar gaf Bleikt góðfúslegt leyfi til þess að birta myndbandið sem hann deildi á Facebook síðu sinni af þeim bræðrum. Myndbandið er sprenghlægilegt og erfitt er að halda inni í sér hlátrinum við það að horfa á þá tvo reyna að halda andliti.