Það voru ekki fallegar móttökurnar sem eigandi hins fjögurra ára gamla Bobbie fékk eftir að hún skildi hann eftir í þrjá klukkutíma heima hjá móður sinni. Bobbie var ekki par ánægður að Tara Jameson, eigandi sinn, hafi skilið sig eftir aleinan til þess að mæta á æfingu fyrir brúðkaup og tók hann því málin í sínar hendur.

Þegar Tara kom aftur að sækja Bobbie hafði hann nagað gat á útihurð móður hennar og stóð kostnaðurinn í um 230 þúsund krónum.

Jameson tók mynd af verknaðinum ásamt skemmdarvargnum sjálfum og virðist hann ekki skammast sín bofs. Bobbie er samkvæmt Töru svolítill vandræðagemsi og þegar kærasti Töru er í heimsókn á hann það til að verða afbrýðisamur út í hann. Bobbie er einnig góður í því að lauma sér á staði sem hann á ekki að vera á en þegar Tara fer að sofa á kvöldin fær Bobbie að liggja til fóta. Þegar hún vaknar hins vegar á morgnanna er hann ávalt kominn á koddann til hennar.

Tara segist í fyrstu hafa verið reið þegar hún kom heim og sá hvað Bobbie hafði gert en fljótlega rann af henni reiðin og áttaði hún sig á því afhverju Bobbie hafði nagað hurðina.

„Ég var nýflutt inn til mömmu og aðeins nokkrum dögum áður þá misstum við gamla hundin okkar. Bobbie elskaði hana mjög mikið og saknar hennar. Það hefur ollið honum aðskilnaðarkvíða og hef ég þurft að fara reglulega heim til þess að gá að honum. Þetta er það versta sem hann hefur tekið upp á því að gera. Fyrst brá mér og ég var reið en síðan áttaði ég mig á því að hann var í svo miklu uppnámi að hafa verið skilinn eftir aleinn,“ segir Tara í samtali við Daily Mail.