Það er aldrei leiðinlegt í Ástralíu, sérstaklega þegar kemur að dýralífi. Nýverið mætti Asha, golden retriever-hundurinn hennar Kerry McKinnon í bænum Strathdownie, heim með lítinn vin á bakinu. Þetta var ungur kóalabjörn sem hefði líklega dáið ef hann hefði ekki rekist á hundinn. Þannig er mál með vexti að það er vetur í Ástralíu og hitinn getur farið niður fyrir 5 stig, sem er alltof kalt fyrir svona litla kóalabirni.
„Þetta var snemma um morguninn og maðurinn minn kallar á mig að ég verði að koma og sjá þetta,“ segir McKinnon í samtali við News.com.au. „Ég skildi ekki neitt í fyrstu en svo sá ég litla kóalabjörninn á bakinu.“
Hún segir að Asha hafi ekkert verið að reyna að losa litla dýrið af sér heldur hafi bara leyft kóalabirninum að kúra á sér. „Ég held að kóalabjörninn hafi dottið úr pokanum á mömmu sinni og hafi fyrir slysni ratað inn í garðinn okkar.“
McKinnon fór með kóalabjörninn til dýralæknis, þaðan fór hann í skýli þangað til hann getur snúið aftur til mömmu sinnar í skóginum.
