Tuttugu og eins árs stúlka hlaut brunasár á fimmtán prósentum líkamanns eftir slys í heimahúsi ekki alls fyrir löngu. Stúlkan sem um ræðir, Sonia Cooper, er Spánverji en var í heimsókn hjá vinum sínum í Toulouse í Frakklandi þegar slysið varð.

Þannig er mál með vexti að klukkan fjögur um nótt datt Soniu það í hug að sjóða pasta á heimili vinar síns. Hún skellti því í pott og beið eftir að suðan kæmi upp, en í millitíðinni sofnaði hún.

Þegar hún rankaði við sér hljóp hún rakleiðis inn í eldhús, en ekki vildi betur til en svo að hún rann á gólfinu og ósjálfráð viðbrögð urðu til þess að hún greip í pottinn með þeim afleiðingum að brennandi heitt vatnið gusaðist yfir hana. Hlaut hún alvarleg brunasár á bringu, handleggjum, hálsi og hluta andlits.

Slysið varð síðsumars 2017 og hefur Sonia verið á batavegi síðan.

Í samtali við Metro rifjar hún upp að hún og vinur hennar hafi reynt að kæla sárin í sturtunni meðan beðið var eftir sjúkrabíl. Það tók hann um klukkustund að koma og segir Sonia að sársaukinn hafi verið næsta óbærilegur. Hún var færð undir læknishendur þar sem löng og ströng endurhæfing tók við, meðal annars húðágræðsla og aðgerðir sem miðuðu að því að takmarka skaðann.

Hún segir að dvölin á sjúkrahúsi hafi verið erfið og einmanaleg, en þegar hún fór í endurhæfingu hafi henni liðið betur því þar voru fleiri í sömu sporum og hún – sumir með verri og stærri ör en hún.

Hún segist enn vera að læra að meðtaka breytinguna á útliti sínu, en hægt og bítandi muni hún læra að elska örin og sætta sig við þau. „Til að byrja með þoldi ég þau ekki en í dag finnst mér þau ekki ljót,“ segir hún og bætir við að þeir sem bera ör eftir slys eða veikindi þurfi ekki að skammast sín, þvert á móti. „Þið eruð hetjur,“ segir hún.