Katrín Lea Elenudóttir bar sigur úr bítum í keppninni Miss Universe Iceland sem haldin var fyrr í mánuðinum og varð með því yngsti þátttakandi keppninnar sem hefur sigrað. Segir Katrín úrslitin ekki hafa komið sér á óvart enda hafi hún æft sig vel í tvö ár.
Katrín Lea er fædd og uppalin í Síberíu þar sem hún bar nafnið Ekatería fyrstu ár ævi sinnar. Mikil fátækt er á þessum slóðum og þegar móðir hennar, Elena Skorobogatova, kynntist íslenskum manni átti líf þeirra eftir að breytast mikið.
„Með þeim tókst vinátta og stuttu síðar flutti hún til Íslands þar sem hann var búsettur en ég varð heima eftir í Síberíu. Næstu fjögur árin bjó mamma Íslandi og vann myrkranna á milli, en ég heima hjá ömmu og afa,“ segir Katrín Lea í viðtali við Írisi Hauksdóttur í nýjasta tímariti Vikunnar.
Þegar Katrín Lea flutti svo með móður sinni til Íslands lét hún breyta nafni sínu og ákvað hún í leiðinni að taka upp nafn móður sinnar í eftirnafn.
„Ég ákvað jafnframt að kenna mig við hana enda ól hún mig upp ein síns liðs. Við vorum alltaf tvær mæðgurnar en áttum gott bakland í foreldrum mömmu sem reyndust okkur vel.“
Þremur árum eftir flutning Katrínar til Íslands sáu mæðgurnar fréttir í rússneska sjónvarpinu þar sem greint hafði verið frá andláti föður hennar.
„Ég þekkti pabba minn aldrei neitt en mamma sagði skilið við hann fljótlega eftir að ég kom í heiminn. Hann reyndi aldrei að hafa samband en hann var um tíma tengdur inn í rússnesku mafíuna sem við teljum að sé ástæða þess að honum var síðar ráðinn bani.“
Faðir Katrínar var skotinn til bana í heimalandi sínu en miklir átakatímar voru í Rússlandi á þessum tímum, eftir fall Sovétríkjanna.
Viðtalið við Katrínu má lesa í Vikunni.
https://www.instagram.com/p/Bm06tb_Ad-h/?utm_source=ig_web_copy_link
Mynd: @north_pole_studio Facebook: @northpolestudioiceland