Dóttir Helga Jóhanessonar kom á dögunum út sem trans strákur. Sigurður Jóhann Helgason sem áður hét Jóhanna Lilja tók upp Sigurðar nafnið eftir móðurafa sínum sem var, samkvæmt Helga, einstaklega ljúfur og víðsýnn maður.
Helgi taldi rétt að deila þeim fréttum að dóttir þeirra væri komin út sem trans strákur þar sem tíðindin séu stór.
„Þessi tíðindi, þó stór séu, þurfa ekki að koma okkur sem best þekkjum til á óvart. Jóhanna var ekki há í loftinu þegar hún harðneitaði öllum fötum sem flokkast sem stelpuföt og varð strax flottur gaur og fór sínar leiðir. Þetta er allt saman rökrétt framhald,“ segir Helgi í færslu á Facebook sem hann gaf Bleitk góðfúslegt leyfi til þess að fjalla um.
„Við búum vonandi núna í það opnu og umburðarlyndu þjóðfélagi að þær áskoranir sem nú mæta Jóhanni verði eitthvað auðveldari viðureignar en áður var. Eitt get ég þó sagt frá rótum hjarta míns: Af öllu því fólki sem ég hef kynnst á minni ævi er það ekki nokkur manneskja sem ég treysti betur til að höndla það allt saman en einmitt Jóhanni sjálfum.“
Faðir Jóhanns er bersýnilega mjög stoltur af honum og þeirri ákvörðun hans að koma út.
„Elsku Jóhann. Þú veist að við elskum þig öll nákvæmlega eins og þú ert. Við hlökkum öll til að fylgjast með þér og standa við bakið á þér og systkinum þínum í framtíðinni og vera til staðar fyrir ykkur öll. Ég gæfi aleiguna fyrir aðeins brotabrot af þeim kjarki og sjálfstæði sem þú hefur til að bera.“