Mig langaði að deila með ykkur einum af mínum uppáhalds réttum þegar mig langar í eitthvað fljótlegt og þægilegt. Það eru ekki of mörg hráefni í réttinum og þegar allt er komið í pottinn get ég sinnt öðrum verkum meðan rétturinn mallar.
Það er auðvelt að sníða réttinn að eigin smekk og gaman að bæta við hann meðlæti eins og ykkur lystir. Guacamole, sýrður rjómi frá Oatly, nachos flögur og salat er t.d. allt meðlæti sem myndi henta vel með þessum rétti.
Hráefni
– 1 rauðlaukur
– 2 paprikur
– 3 hvítlauksgeirar
– 1 tsk salt, oregano, kúmen, chilli duft
– 1 dós svartar baunir
– tómat passata ca 425g
– 1 + 1/3 bolli vatn
– ¾ bolli ósoðið quinoa
– olía á pönnuna
Fínsaxaður laukur er mýktur á meðalheitri pönnu með smáveigis ólífuolíu. Saxaðri papriku, hvítlauk og kryddum er bætt við. Hrærið hráefnunum vel saman og eldið í 5mín. Baunir og quinoa eru skoluð í sigti og loks bætt út í pönnuna.
Vatn og tómat passata fylgir rétt á eftir og öllu hrært vel saman. Náð er upp smáveigis suðu og réttinum leyft að malla með loki á pönnunni í um 30mín., eða þar til quinoað er soðið og mestur vökvinn er gufaður upp.
Berið fram með meðlæti. Rétturinn dugar í um 3-4 skammta.