Arbuckle, sem er búsettur í Skotlandi, barst til samtakanna fyrir skömmu og segir í tilkynningu frá þeim að fyrrum eigandi broddgöltsins hafi ætlað sér að fóðra dýrið nóg til þess að halda á honum hita yfir veturinn. Þá er talið að eigandinn hafi gengið fulllangt og hefur það skaðað heilsu dýrsins, sem í dag er talið vera á stærð við knattspyrnubolta.
Arbuckle er um 2,335 kg á þyngd og er það umtalsvert þyngra heldur en eðlilegt þykir hjá broddgöltum, en þeir eru að meðaltali um 600 g. Segja samtökin að það komi ekki annað til greina en setja dýrið í megrun og stíft æfingaferli.
Dýralæknirinn Keith Marley hjá New Arc segir að dýrið eigi hiklaust eftir að verða önugt á meðan ferlið fer fram, en að samtökin þurfi að sýna vissa grimmd í góðum ásetningi í þessu tilfelli.
„Þetta mun taka sinn tíma og við vonum að innri líffæri og beinabygging dýrsins geti aðlagast ferlinu svo hægt sé að snúa skaðanum við,“ segir í tilkynningu stofnunarinnar.
