Hin rússneska Koku Istambulova er fædd 1. júní árið 1889 og talin elsta manneskjan á lífi að svo stöddu. Hún er vel að máli farin, á auðvelt með göngu og getur séð um sig sjálfa, þó sjónin sé aðeins farin að dvína að hennar sögn.
Skoski fréttamiðillinn Daily Record náði tali af konunni þar sem hún var spurð meðal annars hver lykillinn væri að löngu lífi, en segir hún það vera vilja Guðs að halda henni svona gamalli og telur líf sitt í hnotskurn vera hreina refsingu.
„Ég hef ekki hugmynd um hvernig ég varð svona gömul,“ segir Koku og spáir ekkert í íþróttaiðkun, líkamsrækt eða matargerð almennt. Þolir hún hvorki kjöt né súpur og kann best við gerjaða mjólk og segir einnig að uppáhaldsstaðurinn hennar sé gamalt rúm sem er staðsett fyrir utan húsið hennar. Þar finnst henni oft notalegt að sitja undir skugga trésins sem stendur við rúmið.
Segist hún hins vegar hafa séð sorgina oftar en hún kærir sig um og unnið nær alla sína ævi og aldrei hafa fengið neinn tíma til almennilegrar hvíldar eða skemmtana.
„Ég hef ekki átt einn dag hamingjusöm á allri minni ævi. Ég vildi óska þess að ég hefði dáið ung.“
Koku minnist ekkert á fjölskyldu sína en staðfesti að hún hafi misst mörg börn, þar á meðal sex ára son og lést síðasta afkvæmi hennar fyrir fjórum árum.
„Dagarnir flugu allir framhjá mér þegar ég var í vinnu,“ bætir hún við. „Í dag er ég bara að drattast gegnum lífið.“
