Bandaríski leikarinn Steve Buscemi syrgir eiginkonu sína, listakonuna Jo Andres, sem lést um helgina, 65 ára að aldri. Steve og Jo gengu í hjónaband árið 1987 og voru því gift í rúm þrjátíu ár.
Í fréttum bandarískra fjölmiðla kemur fram að ekki hafi verið greint frá dánarorsök, en Jo og Steve voru mynduð saman í sumar og virtist hún þá vera við góða heilsu.
Jo var listakona og danshöfundur og þá kom hún einnig nálægt hvíta tjaldinu eins og Steve Buscemi. Stuttmynd hennar, Black Kites, frá árinu 1996 vann til fjölda verðlauna á sínum tíma. Hjónin eignuðust einn son saman, Lucian, sem fæddist árið 1990.
Steve Buscemi hefur um langt skeið verið í hópu þekktustu leikara Bandaríkjanna. Hann vann til Golden Globe-verðlauna árið 2011 fyrir leik sinn í þáttunum Boardwalk Empire. Þá hefur hann leikið í vinsælum myndum á borð við Fargo, Reservoir Dogs og The Big Lebowski svo örfá dæmi séu nefnd.