Breski leikarinn Benedict Cumberbatch þiggur ekkert hlutverk nema mótleikkonur hans fái greidd sömu laun og karlmenn. Þetta kom fram í viðtali við Radio Times og telur Cumberbatch þar að „jöfn laun og sæti við borðið“ séu grundvallaratriði femínískra gilda og hvetur aðra karlmenn til þess að fylgja þessari reglu.
Leikarinn eftirsótti stofnaði nýverið framleiðslufyrirtækið SunnyMarch, sem hefur það markmið að þróa fleiri verkefni með konum í aðalhlutverkum. Segir Benedict að megi ekki gleyma því að helmingur áhorfenda séu kvenkyns.
„Ég er stoltur af því að vera aðeins annar karlmanna sem mun sjá um þetta fyrirtæki“, segir Benedict og vísar í samstarfsmann sinn, Adam Ackland, vin sinn og meðframleiðanda.
„Skoðið þessa kvóta á vinnustöðum og spyrjið hvað konur eru að fá í laun, segið svo: ef hún fær ekki greitt það sama og karlmennirnir, neita ég starfinu.“
Benedict hefur fengið jákvæð viðbrögð við ummælum sínum um jöfn laun en þó eru ekki allir jafn sáttir ef marka má samfélagsmiðla. Einn skeptískur notandi á Twitter spurði: „Hvað ef mótleikkonan er að leika sitt fyrsta hlutverk? Er þá sanngjarnt að hún fái sömu laun og aðrir?“
Annar benti á að leikarinn hefði aldrei tekið þessa stöðu, væri hann ekki heimsfrægur: „Eins mikið og ég elska Benedict, er öruggt að hann væri aldrei svona göfugur ef hann vantaði pening. Nafnlaus stjarna, sama af hvaða kyni, á ekki skilið þær milljónir sem stórstjarna í Hollywood þénar.“
Hins vegar eru fleiri ummæli í jákvæðari kantinum og segja margir að tími sé kominn til að einhver standi á sínu í þessum bransa hvað þessi mál varða.