Þú myndir væntanlega aldrei deila tannburstanum þínum með öðru fólki en þegar kemur að snyrtitöskunni er gott að vita hverju þú átt að halda fyrir þig. Eftirfarandi sjö atriði hefur verið mælt með að þú notir ekki með öðru fólki og Bleikt endurbirtir. Þetta skalt þú leggja vel á minnið:
Plokkari:
Allt sem getur komist í snertingu við blóð ættir þú aldrei að lána öðrum. Jafnvel þó þú takir ekki eftir því fylgir oft örlítið blóð þegar hár er plokkað úr hársekknum. Með þessu móti getur bakteríusýking borist á milli fólks. Ef þú lætur plokka augabrúnirnar þínar á snyrtistofu skaltu ganga úr skugga um að plokkarinn hafi verið sótthreinsaður frá því að síðasti kúnni var plokkaður.
Naglaklippur:
Sýkingar og naglasveppir þrífast vel á naglaklippum, alls ekki lána öðrum þínar til að forðast þessa vágesti.
Sápustykki:
Sápa þrífur þig en hún þrífur sig ekki sjálf. Til að koma í veg fyrir að þú þvoir þér upp úr annara manna skít þá skaltu halda þinni eigin sápu fyrir þig. Enn þá betra ráð er að skipta sápustykkinu út fyrir fljótandi sápu í brúsa. Ef þú notar þvottapoka eða skrúbb í sturtunni skaltu passa að þú ein notir það.
Svitalyktareyðir:
Ef þú notar sama svitalyktareyði og einhver annar ertu að maka á þig allskonar bakteríum og blóðögnum sem er ekkert sérstaklega hollt fyrir líkamann.
Rakvélablöð:
Jafnvel þó að þú skerir þig bara örlítið getur þú smitast eða smitað aðra af blóðsjúkdómum á borð við lifrarbólgu og HIV.
Farði:
Það kemur kannski ekki á óvart en þú ættir að forðast að deila förðunarvörum með öðrum. Líkamsvökvar eins og tár, hor, munnvatn, blóð og bakteríur frá bólum eru oft á húðinni og geta hæglega smitast áfram. Þetta þýðir að augnblýantar, augnskuggar, maskari, hyljari, meik, varalitur og púður og förðunarbursta ættir þú ekki að lána öðrum.
Hárbursti:
Gamla góða tuggan að þú eigir ekki að nota hárbursta og húfur frá öðrum af því að þú getur fengið lýs er enn þá gild á fullorðinsárum. Á sama tíma þá getur þú fengið allskonar sýkingar í hársvörðinn.