„Ég get ekki sagt að við höfum lent í erfiðleikum með fylgjendur en þegar fylgjendahópurinn er orðinn svona stór þá fær maður af og til leiðinlegar athugasemdir, sérstaklega eftir að við eignuðumst Storm. Fólk hefur alls konar skoðanir á manni og leyfir sér að segja ótrúlegustu hluti. Yfirleitt er þetta þó bara gaman og krydd í tilveruna,“ segir Kristín Pétursdóttir leikkona og snappari í viðtali við blaðakonu.
Kristín og kærasti hennar Brynjólfur Löve Mogensen halda bæði út vinsælum reikningum á Snapchat þar sem þúsundir manna fylgjast með þeim á hverjum degi. Nýlega eignaðist parið sitt fyrsta barn og segir Kristín þau enn vera að þreifa sig áfram sem fjölskylda en að allt hafi gengið lygilega vel hingað til.
„Fjölskyldulífið hefur lagst mjög vel í okkur og Stormur hefur braggast rosalega vel. Við höfum ekki verið að stressa okkur mikið á hlutunum, heldur spilað þá eftir eyranu og ég tel að það sé lykilþáttur í því hvað Stormur er rólegur og góður. Það hefur ekki haft nein áhrif á okkur að sinna þessu nýja hlutverki sem foreldrar ásamt því að snappa. Stormur er alltaf númer 1,2 og 3. Allt annað er auka.“
Viðtalið má lesa í heild sinni í helgarblaði DV.