Samfélagsmiðlastjarnan Eva Ruza var gestur Evu Laufeyjar í Íslandi í dag í gær á Stöð 2 þar sem fyrrnefnd Eva sýndi listir sínar í eldhúsinu.
Eva rak það hvernig hún hafi náð svo stórum fylgjendahópi á samfélagsmiðlum, en það byrjaði allt með því að hún var rekin upp á svið í litahlaupinu svokallaða árið 2015. Hún vakti það mikla lukku á sviðinu að fylgjendafjöldi hennar á Snapchat margfaldaðist, þó hún kynni lítið sem ekkert á forritið, eins og meðfylgjandi saga sannar.
„Ég vissi ekki að það væri hægt að læsa snappinu. En sem betur fer var ég ekki búin að hrista ber brjóstin framan í alla aðdáendur mína þá. Það gerðist nokkrum mánuðum áður,“ segir Eva og heldur áfram að lýsa því þegar hún tók upp snapp snemma á sunnudagsmorgni.
„Ég ætlaði að vera ógeðslega fyndin að senda vinkonum mínum,“ segir hún og lýsir því hvernig hún tók upp Snapchat-mynd af sér berbrjósta uppi í rúmi að hrista brjóstin.
„Ég valdi svo allar vinkonur mínar og valdi svo My Story, því þá hélt ég að þær gætu horft á þetta í 24 tíma.“
Hins vegar gátu allir fylgjendur Evu horft á brjóstahristinginn þar sem My Story er opið fyrir alla fylgjendur.
„Þetta voru mín stærstu mistök á samfélagsmiðlum,“ segir Eva, sem fékk áfall stuttu eftir að snappið fór í loftið. „Það var ekki fyrr en þremur tímum seinna sem vinkona mín, hún Systa, sagði: Bróðir minn var að horfa á þig hrista brjóstin,“ segir Eva. „Þá fékk ég bara panikk.“
Horfa má á innslagið í heild sinni hér fyrir neðan: