Söngvarinn Sam Smith hefur nú viðurkennt að hann hafi barist við líkamsímynd sína í langan tíma. Hefur hann meðal annars svelt sjálfan sig til þess að „líta betur út“ fyrir myndatökur.
„Ef ég var að fara í myndatöku og átti jafnvel að vera í stuttermabol, þá svelti ég mig í margar vikur fyrir. Eftir myndatökuna benti ég á alla þá galla sem ég sá á sjálfum mér og tók myndina niður,“ segir Sam Smith á Instagram síðu sinni.
„Í gær ákvað ég að ég ætlaði fjandakornið að berjast til baka. Endurheimta líkama minn og hætta að reyna að breyta hinu og þessu og elska þessar mjaðmir og þær útlínur sem móðir mín og faðir gáfu mér og elska svo mikið. Sumir eiga kannski eftir að taka þessu sem sjálfsást og finnst ég vera að sýna mig en ef þið vissuð hversu mikið hugrekki það þarf fyrir mig til þess að segja frá þessu og gera þetta og áfallið sem ég hef upplifað vegna líkama míns frá því ég var barn þá myndi fólki ekki finnast það.“
Smith fór í myndatöku til ljósmyndarans Ryan Pfluger og þakkar hann honum fyrir þá andlegu hjálp sem hann veitti honum með myndatökunni.
„Mér hefur aldrei fundist ég jafn öruggur eins og með þér. Það mun alltaf vera barátta fyrir mig að horfa í spegil en þessi myndataka, þessi dagur var skref í rétta átt.“