„Ég hef lengst hlaupið tíu kílómetra svo að þetta verður ákveðin áskorun fyrir mig og sömuleiðis fyrir hinar. Ég get samt auðvitað bara talað fyrir mig sjálfa. En markmið okkar er að komast að endamarkinu, hvort sem það er hlaupandi, skokkandi eða labbandi,“ segir Katrín Helga Daðadóttir bloggari á síðunni Vynir í samtali við blaðakonu.
Stelpurnar sem halda úti bloggsíðunni tóku sameiginlega ákvörðun um það að skora á sjálfa sig og aðra bloggara landsins að taka þátt í Reykjavíkurmaraþoninu í ágúst næstkomandi. Ætla stelpurnar að hlaupa 21,1 kílómetra til styrktar Minningarsjóðs Einars Darra.
„Ég á bara eitt líf snertir okkur allar á einn eða annan hátt og langar okkur til þess að hlaupa til styrktar því. Við vorum allar sammála því. Eins og er er helmingur hópsins að fara að hlaupa 21,1 kílómetra og það getur vel verið að fleiri bætist við. Markmið okkar er að safna 100.000 krónum en allt umfram það væri bara yndislegt.“
Ákvað hópurinn að taka áskorun sína skrefinu lengra með því að hvetja aðra bloggara til þess að gera slíkt hið sama.
„Síðasta sumar datt mér þetta í hug en lét ekkert verða af því að viðra hugmyndina. Síðan fyrir áramót talaði ég við Svandísi um þetta og hún stakk upp á að við færum 21,1 kílómetra. Mig langaði þó að gera eitthvað skemmtilegt úr þessu líka þar sem að þetta er gott hópefni þar sem við vinnum saman að markmiði. Með því að skora á aðra myndast ákveðin samkeppni og hvatning til þess að standa okkur og klára þetta.“
Skoruðu stelpurnar á bloggara hjá síðunni Öskubuska til þess að taka einnig þátt og hvöttu þær til þess að láta boltann rúlla áfram.
„Annars viljum við hvetja sem flesta til þess að prófa að hlaupa í maraþoninu, það er engu líkt og allt gert fyrir góðan málstað.“
Hér fyrir neðan má heita á stelpurnar og hvetja þær áfram:
