Silvia Rakel Guðjónsdóttir lenti í ömurlegu atviki á Álftanesi fyrr í dag þegar hún var úti að ganga með sex mánaða gamlan son sinn í vagni. Ekki var búið að moka gangstéttirnar og ákvað Silvia því að ganga á götunni alveg upp við stéttina þegar bíll kemur askvaðandi á móti henni og keyrir alveg upp að vagninum.

„Þetta var alveg ömurlegt! Ég varð sko hrædd og ég verð það ekki auðveldlega,“ segir Silvia í samtali við blaðamann.

Segir Silvia að feikinóg pláss hafi verið á götunni og að ekkert mál hefði verið fyrir bílinn að keyra fram hjá henni án þess að koma nálægt þeim. Atvikið átti sér stað fyrir utan Bjarnastaðavör á Álftanesi þar sem gömlu bæjarskrifstofurnar eru.

„Hann keyrir alveg upp að vagninum, horfir hótandi á mig út um framrúðuna og leggst á flautuna. Ég þurfti að keyra vagninn upp á snjóhjól við gangstéttina svo hann „kæmist“ fram hjá! Á ekki orð! Til þín dóni, skammastu þín!!!!“ Segir Silvía reið og er skiljanlega í miklu áfalli eftir atvikið.