Ef þú hefur einhvern tímann keypt þér nýja vöru þá er líklegt að þú kannist við þennan litla hvíta poka sem virðist fylgja með í kaupbæti.
Pokarnir eru merktir „Silica gel“ og þeir koma með nánast hvaða vörum sem þú kaupir þér. Allt frá ferðatöskum til lítilla rafmagnstækja. Á pokanum stendur að þú megir alls ekki borða hann og að þú eigir að henda honum strax. Margir hræðast því innihald pokans og passa sig að koma honum strax úr augnsýn, sérstaklega ef lítil börn eru á heimilinu. En af hverju stendur á pokanum að þú megir ekki borða hann?
Í fyrsta lagi þá er sumt fólk furðulegt. Það gæti borðað innihald pokans einungis fyrir forvitnissakir og kært svo seljanda vörunnar ef ekki stæði á pokanum að það mætti ekki borða hann. Í öðru lagi þá er möguleiki á því að fólk gæti ruglast á þessum pokum og samskonar pokum sem innihalda sykur.
Sama hver ástæðan fyrir því að einhver skyldi leggja sér þessa poka til munns, þá hafði Metro áhuga á því að fá að vita hvað skyldi gerast ef það yrði gert. Höfðu þeir því samband við læknir hjá PushDoctor og fengu nánari upplýsingar.
„Silica gel er ekki talið vera með eiturefnum og er ólíklegt að fólk fyndi fyrir einhverjum einkennum ef það myndi borða pokann. Það er möguleiki á því að manneskjunni yrði flökurt og gæti hún farið að kasta upp eða fá niðurgang, í þeim tilfellum ætti að hafa samband við lækni. En ef manneskja myndi óvart borða innihald pokans, fyndi ekki fyrir neinum aukaverkunum og liði vel í kjölfarið er engin ástæða til þess að hafa áhyggjur.“
Niðurstaðan er því sú að þrátt fyrir að flestir telji að Silica gel pokarnir séu hrikalega eitraðir þá eru þeir það í raun og veru ekki. En þeir bragðast líklega ekkert sérstaklega vel og bara þær upplýsingar að þú gætir farið að kasta upp eða fá niðurgang ætti að stöðva þig frá því að vilja smakka.