Pálína Ósk Ómarsdóttir heldur úti vinsælli lífstílssíðu á Instagram þar sem um fimmtán þúsund manns fylgjast með henni daglega. Viðurkenndi Pálína það fúslega að í langan tíma hafi hún sett óraunhæfar kröfur á líkama sinn. Þegar hún var yngri hafi sjálfstraust hennar verið lítið sem ekkert og að á tímabili hafi hún verið orðin virkilega veik af átröskunarsjúkdómi. Fyrir átta vikum síðan eignaðist Pálína sitt fyrsta barn eftir erfiða meðgöngu og fæðingu sem uppskar mikið fæðingarþunglyndi.
„Ég get viðurkennt það að ég fékk tímabil um daginn þar sem ég var hágrátandi yfir því hvernig ég lít út í dag og grét oftar en einu sinni. En maður þarf að minna sig á að við erum ekki allar eins byggðar og erum allar flottar eins og við erum,“ segir Pálína í nýjustu færslu sinni á Instagram þar sem hún birtir myndir af líkama sínum fyrir meðgöngu, á meðan á meðgöngu stóð og eftir fæðinguna.
„Meðgangan var erfið ég fékk mikla grindargliðnun, varð mjög bakveik, gat ekki setið vegna verkja í rifbeinum, fékk meðgöngusykursýki sem var greind allt of seint, var lág í járni sem var ekki meðhöndlað og fékk ekki að vita fyrr en um 6 vikum eftir fæðingu. Ég gat ekkert æft á meðgöngunni og gat varla gengið án þess að vera með hækjur.“
Fæðing Elís Þórs, sonar Pálínu, tók mikið á en hún fór í gangsetningu og belgurinn var sprengdur.
„Miklar og harðar hríðar, ég fékk hita, ældi og rifnaði illa. Hann Elís festist í grindinni þannig að á milli rembinga náði ég ekki að hvíla vegna mikla verkja í lífbeininu. Já þetta er einfaldlega ekki auðveld lífsreynsla fyrir mig en algjörlega þess virði og ég sé ekki eftir einu augnabliki.“
Í kjölfar fæðingarinnar fékk Pálína fæðingarþunglyndi sem gerði það að verkum að hún átti erfitt með að sætta sig við breytingarnar sem höfðu átt sér stað á líkama hennar.
„Líkaminn minn breyttist í takt við þetta allt. Til dæmis þá stækkaði maginn um 34 cm og ég þyngdist um 15 kíló. Það tekur hann góðan tíma að ganga til baka að hluta til en ég reikna með því að ég verði aldrei eins og það er í góðu lagi. Í dag er ég með slit, litla lafandi mallan minn, þéttari en ég var og með stærri mjaðmir. Það er hinsvegar ekkert auðvelt að læra að elska sig aftur, enda þarf ég að elska nýjan líkama.“
Pálína grét vegna breytinganna sem höfðu átt sér stað en ákvað frekar að taka sig saman í hausnum og minna sig á allt sem hún hefur lært varðandi sjálfsást.
„Í dag er ég á betri stað, er ánægð með mig og stolt af öllum smáu skrefunum sem ég næ. Til dæmis að geta farið í göngutúr aftur og mæta í ræktina. Í stað þess að berja mig niður, ríf ég mig upp. Markmiðin mín snúast um að ná betri heilsu, elska mig og njóta lífsins. Besta við þetta allt er að maðurinn minn styður mig alla daga og minnir mig á það hversu flott honum finnst ég vera. Svo auðvitað, ég eignaðist lítinn gullmola.“
Segist Pálína vilja deila þessari hlið meðgöngunnar sem virðist of oft ekki fjallað nægilega mikið um.
