Þann 13. janúar síðastliðinn fór fram blessun í Kapellunni í Lindakirkju. Blessunin væri ekki í frásögur færandi nema vegna þess að þessi tiltekna blessun var með nokkuð óhefðbundnu sniði. Ingibjörg Dóra Bjarnadóttir, kölluð Inga Dóra, tók ákvörðun um að láta blessa hundinn sinn, Bæn Önnu, við hátíðlega athöfn að viðstöddum vinum og vandamönnum.
„Blessanir gæludýra eru tileinkaðar Antoníusi, verndardýrlingi dýra, og Rochus, hinum kaþólska verndardýrlingi hunda. Hundablessun er nýnæmi á Íslandi en tíðkast víða erlendis. Eftir að hafa lesið í fjölmiðlum um hundablessanir þá sló ég til og hélt eina sjálf fyrir mína Bæn Önnu,“ segir Inga Dóra í viðtali við Bleikt.
Bæn Anna er af tegundinni Miniature Pinscher og var það séra Guðni Már Harðarson sem sá um að blessa hana.
„Þetta var hugguleg stund í kapellunni þar sem Guðni talaði við okkur, sunginn var sálmur og ég hélt á Bæn Önnu. Ekki var notað vatn og var Bænin mín róleg og góð. Anna amma útbjó blessunarkjól og mamma fékk nöfnu. Nafnið er (til) Bæn-anna minna. Þegar ég kom og skoðaði hana í fyrsta sinn þá kallaði ég á tíkina Bæn, hún kom strax. Frá fyrsta degi okkar saman byrjaði hún að svara nafni sínu, mér fannst það frábært að nokkurra vikna svaraði hún nafni sínu.“
Inga Dóra segir blessanir hunda mjög algengar erlendis en að hefðin sé nýkomin til Íslands.
„Nokkrar kirkjur hafa boðið upp á blessunardag og sá Lindakirkja um blessunina fyrir mína tík. Í blessuninni vorum við tólf og héldum við blessunarboð að henni lokinni þar sem hún fékk blessunargjöf. Einnig fékk hún nokkrar jólagjafir um jólin og innflutningsgjöf þegar hún kom til okkar, þá héldum við innflutningspartí. Það er alltaf talað um hunda sem vini mannsins. Hundar eru góð gæludýr og oftar en ekki hluti af fjölskyldunni, því er gott mál að blessa hundana að mínu mati. Hundar róast mikið eftir að hafa fengið blessun. Blessunin á sér erlenda fyrirmynd meðal kristinna manna, hundamessur hafa verið haldnar árlega í meira en áratug erlendis.“
Greinilega má sjá að Ingu Dóru þyki virkilega vænt um Bæn Önnu og segir hún að þegar tíkin sé óróleg þá leyfi hún henni að hlusta á heilunartónlist ásamt því að heila hana, þá róist hún mikið. Inga stofnaði Snapchat-reikning fyrir þá sem hafa áhuga á því að fylgjast með Bæn Önnu: sigrumheiminn1