Þegar par er að reyna að eignast barn getur það rekist á ýmsar hindranir áður en því tekst áætlunarverk sitt. Sem betur fer er það ekki algilt en getur þó komið fyrir.

Læknar geta skoðað þau vandamál sem algeng eru þegar pör glíma við ófrjósemi en þrátt fyrir það liggur orsökin ekki alltaf augljóslega fyrir. Samkvæmt Diply geta ástæðurnar verið margþættar en eitt vandamálið er að sumir karlmenn hafa lélega sæðisframleiðslu. Ástæðurnar fyrir því geta verið margar, allt frá lyfjagjöf til andlegra vandamála. En það er ein ástæða fyrir lélegri sæðisframleiðslu sem margir virðast gleyma: Hiti. Það er erfitt að segja til um nákvæmlega hversu mikið vandamál hiti hefur á sæðisframleiðslu karlmanna en það er þó þekkt sem mögulegt vandamál.

Fyrirtækið CoolTec hefur því hafið framleiðslu á eistnakælara. Það eru kannski ekki allir sem eyða löngum stundum í gufubaði eða heitapotti en það eru ekki einu leiðirnar til þess að eistun verði fyrir of miklum hita. Það að sitja lengi, jafnvel í þröngum fötum og með fartölvu ofan á þér getur haft þær afleiðingar að of mikill hiti myndast hjá eistunum sem framleiða þá færri sæðisfrumur.

Eistnakælarinn var þróaður af hópi vísindamanna og er hann gerður þannig að tvær skálar halda utan um eistun og sjá um að kæla þau. Kælirinn sér líka um að safna upplýsingum um almennt hitastig þitt og sendir þær í forrit í símanum þínum sem læknir getur svo farið yfir.