Ingibjörg Gróa Gunnarsdóttir missti bróður sinn í september árið 2014 er hann féll fyrir eigin hendi. Stofnaði Ingibjörg hóp á Facebook sem kallast: „Aðstandur ástvina sem féllu fyrir eigin hendi“ en þar geta aðstandendur meðal annars leitað ráða og fengið stuðning.

„Ég man að eitt það fyrsta sem kom upp í hugann þegar ég áttaði mig á hvað hefði gerst var það að eitthvað sem ég taldi mér svo fjarlægt hafði bankað upp á hjá mér. Flest okkar telja að sjálfsvíg eigi sér bara stað innan viss hóps og var ég ekkert frábrugðin þeim,“ segir Ingibjörg í viðtali á Sykur. Ingibjörg gaf Bleikt góðfúslegt leyfi til að birta skjáskotin sem fylgja umfjöllun en þau varpa ljósi á að margir hafa litla skilingu á hversu alvarlegur sjúkdómur þunglyndi er.

Segir Ingibjörg að sjálfsvíg spyrji ekki um kyn, aldur eða stöðu rétt eins og aðrir sjúkdómar og að það sé ein helsta dánarorsök ungra karlmanna á Íslandi.

„Miðað við nýjustu tölur er u.þ.b. eitt sjálfsvíg í hverri viku. Þrátt fyrir mikla vitundarvakningu í þjóðfélaginu yfir tíðni sjálfsvíga er mikið um fordóma, skilningsleysi og vanþekkingu á málefninu.“

Eitt af því fyrsta sem fólk spyr aðstandendur að þegar það heyrir af sjálfsvígi segir Ingibjörg að sé: „Hvað gerðist? Af hverju gerði hann/hún þetta ? Og oftar en ekki fylgir með hvort einstaklingurinn hafi átt í einhverjum vanda með vímuefni.“

Í kjölfarið fylgi oft yfirlýsingar um það að einstaklingurinn hafi valið þetta og að þessa hegðun sé hægt að kalla eigingirni. Segir Ingibjörg að rannsóknir sýni það að meiri hluti þeirra sem fallið hafi fyrir eigin hendi hafi ekki átt við vímuefnavandamál að stríða og að slíkar spurningar reynist syrgjandi aðstandendum afskaplega erfiðar.

„Mundirðu spyrja syrgjandi ástvin krabbameinssjúkling hvort viðkomandi hafði reykt? Eða hvort viðkomandi hefði verið í lyfjagjöf? Af hverju teljum við okkur eiga rétt á að hnýsast og koma með óviðeigandi yfirlýsingar tengdum geðsjúkdómum en okkur myndi aldrei detta í hug að koma með sambærilegar yfirlýsingar varðandi aðra sjúkdóma eins og t.d. krabbamein eða hjartasjúkdóma? Hvar liggur munurinn þarna á milli? Aðgát skal höfð í nærveru sálar!“