Hin Japanska Marie Kondo hefur verið mikið í umræðunni undanfarið eftir að sjónvarpsþættir hennar voru gefnir út af Netflix. Marie Kondo er þekkt fyrir það að nota sérstakar aðferðir til þess að halda heimilinu hreinu og fyrir sjö árum síðan gaf hún út bókina „The Life Changing Magif of Tidying Up“.
Í sjónvarpsþáttunum fer Marie Kondo heim til fólks sem virðist ekki geta náð tökum á heimilisþrifum, safnar jafnvel að sér of miklu dóti og þarf aðstoð við skipulag. Eftir að Marie hefur gefið þeim ráð sér fólkið um að fylgja þeim og hefur nokkrar vikur til þess að klára allt heimilið áður en Marie kemur aftur og fer yfir allt.
Þættirnir hafa fengið mikið áhorf og margir hafa tileinkað sér aðferðir Marie til þess að halda heimilinu í röð og reglu. Metro hafði hins vegar áhuga á því að vita hvort aðferðir Marie gætu gert það að verkum að fólki fer að líða verr en áður.
Sálfræðingurinn Chris Stiff sem starfar við Keele háskólann segir að svarið við því sé einfaldlega já. Aðferðir Marie séu svo víðtækar að þær geri það að verkum að fólki muni mistakast að fara eftir þeim. Það að mistakast verkefni sem fólk ákveður að fara út í lætur þeim líða enn verr en áður.
„KonMari aðferðin er ströng, krefst mikillar skuldbindingar, tíma og orku ef fólk ætlar að ná að klára allt,“ segir sálfræðingurinn.
„Ef Marie Kondo stendur ekki yfir þér þá getur verið erfitt að klára verkefnið og það að mistakast getur verið skaðlegt velferð okkar. Rannsóknir sýna að ef fólk gefst upp á verkefni þá sé það líklegra til þess að standa sig enn þá verr í samskonar verkefnum í framtíðinni og gerir það að verkum að það fer að kenna sjálfu sér um hluti á óheilbrigðan máta.“
Það að leggja áherslu á það að geyma aðeins hluti sem vekja með fólki hamingju getur einnig gert það að verkum að fólki finnst erfitt að losa sig við dót.
Segir sálfræðingurinn einnig að það að þakka hlutum fyrir að hafa fengið að eiga þá og nota áður en þú losar þig við þá sé líka slæmt.
„Rannsóknir sýna að það að persónugera hluti lætur okkur tengjast þeim tilfinningalega sem gerir okkur enn þá erfiðara að losa okkur við þá.“