Gæludýraeigendur eru gjarnan órólegir í kringum áramótin vegna dýranna sinna sem geta orðið virkilega hrædd vegna hávaðans í flugeldunum. Þá hafa margir beðið fólk vinsamlegast um að halda sprengingum í lágmarki og að skjóta aðeins upp á þeim dögum sem löglegt er.
Sú beiðni hefur ávalt verið virt að vettugi sem oft hefur skapað mikla gremju gæludýraeigenda sem og fólks með ung börn, sem ekki geta sofið vegna hávaðans.
Í gær lenti Berglind Ósk Sigurðardóttir í virkilega leiðinlegu atviki þegar hún var úti að ganga með sex mánaða gamlan hvolp sinn rétt hjá Víkinga hótelinu í Hafnarfirði.
„Áðan var ég úti að labba með sex mánaða hvolpinn minn þegar ég heyri að krakkar eða unglingar eru að sprengja flugelda. Við kippum okkur ekkert mikið við það og löbbum áfram. Svo er allt í einu kallað: „Hey gríptu“ og víti er kastað í áttina að okkur. Hvolpurinn minn stökk og panikkar og mér brá svo svakalega að ég fraus gjörsamlega,“ segir Berglind í færslu á Hundasamfélaginu.
Berglind var skiljanlega í miklu áfalli og vildi hún greina frá atvikinu í þeirri von um að vara aðra við.