Hjalti Skaptason saknar eiginkonu sinnar til 35 ára, Jónínu Þorsteinsdóttur strax, en hún þarf að dvelja á Húsavík í sex vikur í hvíldarinnlögn. Jónína er haldin heilabilunarsjúkdóm en fær ekki forgang í innlögn eða dvöl á hjúkrunarheimili vegna þess að hún þiggur ekki alla þá aðstoð sem er í boði. Hjalti segir í samtali við Morgunblaðið í dag að hann vilji vekja athygli á ástandi í málefnum fólks með heilabilunarsjúkdóma.
Hjónin búa á höfuðborgarsvæðinu en þar sem Jónína uppfyllir ekki skilyrði til að komast á forgangslista fyrir innlögn eða dvöl á hjúkrunarheimili, urðu þau að snúa sér til Húsavíkur. Hjalti fylgdi henni með flugi til Húsavíkur í gærmorgun.
„Ég kem fram með okkar sögu til þess að benda á ástandið í málefnum fólks með heilabilunarsjúkdóma. Ég hef góðan stuðning en það eru ekki allir sem hafa hann,“ segir Hjalti í samtali við Morgunblaðið. Hann segir Jónínu eiga erfitt með að koma á ókunna stað og að hún geri sér ekki neina grein fyrir aðstæðum þar sem heilsu hennar hefur hrakað mikið á síðustu tveimur árum og sé hún í dag ófær um að sjá um sjálfa sig. Dóttir Jónínu býr á Húsavík, en það er eina tenging þeirra hjóna við bæjarfélagið.
Hjalti saknar Jónínu sinnar strax en vonast þó til að geta heimsótt hana einu sinni til Húsavíkur á þeim sex vikum sem áætlað er að hún dvelji þar.