Brad Pitt og Charlize Theron eru sögð vera að stinga saman nefjum um þessar mundir en tvö ár eru síðan Pitt skildi við leikkonuna Angelinu Jolie.
Pitt, sem er 55 ára, og Theron, sem er 43 ára, eru sögð hafa verið afar náin á samkomu sem haldin var í síðustu viku. Heimildarmaður The Sun heldur þessu fram. Var það sameiginlegur vinur þeirra og fyrrverandi unnusti Theron, leikarinn Sean Penn, sem kynnti þau.
Á samkomunni sem um ræðir var myndin Roma, sem hlotið hefur einróma lof gagnrýnenda sýnd, en samkoman fór fram í Chateau Marmont í Hollywood þann 12. janúar síðastliðinn. Heimildarmaðurinn segir að Pitt og Theron hafi verið mjög náin þegar þau sátu við barborðið, Pitt hafi meðal annars haldið utan um hana. Sjálfur hélt Pitt sig við vatnið en Theron sötraði á vodka-kokteil.
Pitt og Theron eru meðal þekktustu leikara Hollywood og hafa þau bæði unnið til Óskarsverðlauna; Theron fyrir myndina Monster árið 2004 og Pitt, ásamt fleirum, fyrir 12 Years a Slave árið 2014.
