„Þú ert mjög sæt en þarft að vinna í spikinu.“ Þessi skilaboð fékk lífstílsbloggarinn og baráttukonan Fanney Dóra á samfélagsmiðlinum Snapchat í gær.
Skilaboðin voru send undir leyninafni og birti Fanney Dóra þau ásamt mynd af sjálfri sér á Instagram í gær. Fanney Dóra fordæmir þá manneskju sem sendi henni skilaboðin og segir hana greinilega eiga eitthvað bágt fyrst hún telji sig þurfa að gagnrýna hana.
„Heldur þú kæra manneskja sem átt greinilega bágt að gagnrýna mig, að orðin þín hafi áhrif á mig? Heldurðu ekki að ég hafi sagt allt ljótt í heiminum við mig sjálfa þannig að orðin þín verða innantóm og kjánaleg. Þú ert enn óheppnari því þessi orð hafa ekki lengur nein áhrif á mig og hafa ekki haft í langan tíma. Ég vona að þú elsku hjarta munir laga það sem er að í þínu lífi því ég er hamingjusöm með mig og minn líkama.“
Undanfarið hafa margir lífstílsbloggarar og fleira fólk sem gjarnan teljast fyrirmyndir ungs fólks í dag tjáð sig opinberlega um líkamsást og fitusmánun. Vilja þau með því útrýma gagnrýni fólks á líkama annara og kenna fólki að meta sig eins og það er.
