Fyrir um sjö mánuðum deildi Facebook-síðan Poche Muzik myndband af Leoncie, sem stundum er kölluð Indverska prinsessan eða Ískryddið. Síðan sérhæfir sig í svokölluðu hamfarapoppi eða bjánapoppi, líkt og það hefur verið íslenskað. Myndbandið virðist hafa verið sýnt á Popptíví á sínum tíma en það má sjá hér fyrir neðan.

Nú hefur verið horft á myndbandið vel ríflega 3,4 milljón sinnum og nálgast óðfluga 3.5 milljónir og eru tæplega sex þúsund athugasemdir. Fáir tónlistarmenn íslenskir hafa fengið viðlíka dreifingu, en illa er þó vegið að Leoncie og hún sögð allt frá því að vera pervísk amma yfir í andsetin en hún fær þó einnig stuðning þó minna fari þó fyrir honum. „Það er ekkert grín að vera haldinn illum öndum,“ skrifar Michael Vouras og fær tæplega fimm hundruð læk. Nokkrir gera grín að því að firmamerki Pepsi sjáist í bakgrunni. „Þetta er ástæðan fyrir því að ég drekk ekki Pepsi,“ segir Cliff Russell.

Mörgum er þó verulega skemmt yfir myndbandinu, líkt og Carla Lynn Johnson. „Guð minn góður, ég hef ekki hlegið svona mikið lengi. Andsetin, vergjörn kona sem vann meistaratitill fyrir syngja fögnuð Pepsi Cola,“ segir Johnson. Síðan eru aðrir sem koma prinsessunni til varnar. Þannig segir einn notandi: „Ég verð að vita hver þessi kona er. Ég hef séð önnur geggjuð myndbönd og hún er hetjan mín. Ef einhver veit um fleiri myndbönd verðið þið að láta mig vita.“  Þá kveðst Jaune B Louk vilja komast yfir myndbandið í almennilegum gæðum til að gera það að sínu.

Myndbandið hefur eins og áður segir vakið gríðarlega athygli og verið deilt tæplega 30 þúsund sinnum en það má sjá hér fyrir neðan.

https://www.facebook.com/pochemuzik/videos/1825688507738789