Að koma sér í form eftir meðgöngu eða nei, bara í form yfir höfuð getur verið virkilega erfitt bara. Ég var í rúma 9 mánuði að koma mér í mitt drauma form eftir meðgöngu svo ég veit hvað ég er að tala um!
Það eru liðnir 5 mánuðir frá fæðingu Kristelar, ég hef misst 10 kíló og held ótrauð áfram.
Að stíga inn í ræktarsal getur verið yfirþyrmandi og ógeðlega erfitt (bíddu aðeins þetta verður betra) ekki hætta að lesa alveg strax.
Ég var í 9 mánuði að losa mig við rúm 20 kíló. Ég byrjaði þegar að við fjölskyldan bjuggum uppi á barnaspítala Hringsins með eins árs gömlu dóttur okkar, sem var að berjast við ólæknandi lungnasjúkdóm (er við héldum á þeim tíma). Anja veiktist í enda september 2015 (þá féll hún í mettun í fyrsta skiptið). Með hverjum deginum hrakaði Önju Mist og gáfust lungun svo upp á endanum og dvaldi hún í öndunarvél í rúman mánuð samanlagt. Blessunarlega séð losnaði Anja úr öndunarvélinni 24. desember og í lok þess mánaðar kvöddum við gjörgæsluna og héldum við niður á barnadeild.
1. janúar tók ég þá ákvörðun að snúa við blaðinu og breyta umlífsstíl. Þarna vorum við búin að dvelja upp á barnaspítala í fjóra mánuði og þegar að ég tók þess ákvörðun áttum við eftir að dveljaupp á spítala í þrjá mánuði í viðbót, úti og hér heima.
Ég missti fyrstu 9 kílóin á þessum þremur mánuðum sem var mikill sigur. Ég veit vel hvernig það er að koma sér í form undir álagi sem er ekkert grín og getur tekið svakalega á en taktu það frá mér: ÞETTA ER HÆGT!
Með hverjum deginum sem leið varð þetta skemmtilegra og SKEMMTILEGRA, þetta hætti að vera eitthvað sem ég varð að gera (ég er þar núna) og varð með tímanum mín ástríða.
Ég var það hungruð í bætingar að ég mætti á hverjum degi með dóttur mína sem var bundinn við súrefni allan sólarhringinn. Ég tók súrefniskútinn bara með og bar hann á bakinu. Hversu mikið ert þú tilbúin til þess að leggja á þig til þess að ná þínum markmiðum?
Engar áhyggjur ég er á þeim stað núna að ég þarf hvatningarræðu frá manninum mínum í hvert skipti sem ég ætla mér að vakna í ræktina.
Ræktin er í göngu færi svo ég hef í rauninni enga ástæðu til þess að mæta ekki.
„Vertu sterkari en afsakanir þínar“
Þetta var mitt mottó og ætla ég að tileinka mér þetta í þessu skemmtilega ferðalagi!
En jæja þú ert væntanlega að lesa þennan pistil til þess að fá smá hvatningu og spark í rassinn, ekki satt ?
Ef svo er vil ég hvetja þig til þess að lesa lengra!
Hér koma nokkur lykilatriði sem hjálpuðu mér að komast í mitt draumaform
Einhvers staðar las ég að markmið eru eldsneytið í ofni afrekanna, en manneskja án markmiða er eins og skip án stýris.
Þeir sem læra að setja sér markmið og vinna eftir þeim geta afkastað meiru á einu til tveimur árum en margir gera á heilli ævi.
Þetta á við um allt, ekki einungis fólk sem er að koma sér í form!
Ég mun skrifa nýja færslu um leið og settu markmiði er náð og leyfa ykkur svolítið að fylgjast með. Þetta er bæði hvatning fyrir sjálfa mig og aðra. Þið getið fylgst með mér á snappinu mínu gudbjorghrefna og hafið þetta ferðalag með mér!
Færslan er skrifuð af Guðbjörgu Hrefnu og birtist upphaflega á Mæður.com
