Þegar Lady Gaga var aðeins nítján ára gömul lenti hún í kynferðislegu ofbeldi sem hefur enn þann dag í dag gríðarleg áhrif á líf hennar. Söngkonan, sem er orðin þrjátíu og tveggja ára gömul, opnar sig sjaldan um einkalíf sitt en nú segist hún ekki vilja fela sig lengur.
Gaga viðurkennir í viðtali við Vogue að henni hafi liðið hræðilega á hverjum einasta degi síðan ofbeldið átti sér stað.
„Það vissi engin annar af þessu. Það var nánast eins og ég hefði reynt að eyða þessu úr heilanum mínum. Og loksins þegar þetta kom út þá var þetta eins og stórt, ljótt skrímsli. Þú verður að horfast í augu við skrímsli til þess að ná bata. Fyrir mér, með mína andlegu heilsubresti þá leið mér eins og hálf baráttan hafi verið í upphafi. Mér leið eins og ég væri að ljúga að heiminum af því að ég upplifði svo mikinn sársauka sem enginn vissi af. Það er ástæðan fyrir því að ég ákvað að stíga fram og segja frá því að ég sé með áfallastreituröskun, því ég vil ekki fela mig lengur – ekki meira heldur en ég þarf nú þegar að gera.“
Gaga útskýrir hvernig líðan hennar sé á hverjum degi líkt og hún sé stanslaust á leið niður stóra brekku í rússíbana.
„Óttinn sem maður finnur í maganum. Ég á erfitt með að anda og allur líkami minn fer í krampa. Svo byrja ég að gráta. Þannig er líf fórnarlamba sem lent hafa í áföllum á hverjum degi, og það er… ömurlegt.“
Söngkonan hefur lengi glímt við vefjagigt og hefur opnað sig um það hvernig veikindi hennar hafa haft gríðarleg áhrif á sýningar hennar og frama. Hún hefur einnig viðurkennt það að hún verði pirruð þegar fólk trúi því ekki að vefjagigt sé raunveruleg
„Ég verð svo pirruð þegar fólk sem glímir ekki við vefjagigt, trúir því ekki að hún sé raunveruleg. Hjá mér og líklega mörgum öðrum þá er þetta tilkomið vegna kvíða, þunglyndis, áfallastreituröskun, áfalls og kvíðaröskun. Allt þetta setur taugakerfið á ofkeyrslu og þá fær maður taugaverki. Fólk þarf að sýna meiri skilning. Langvarandi verkir eru ekkert grín. Á hverjum degi þá vaknar maður upp og veit ekki hvernig manni á eftir að líða þann daginn.“
