Hönnuðurinn Mindy Scheiers tók þátt í New York Fashion Week með sýningu þar sem allar fyrirsæturnar voru fólk með einhverskonar fötlun.
Árið 2014 bað sonur Mindy, Oscar Scheier, móður sína um að hanna fyrir sig buxur sem væru í tísku og sem hann gæti passað í. Oscar þjáist af sjaldgæfum vöðvarýrnunarsjúkdómi sem gerir það að verkum að hann hefur alltaf átt erfitt með að finna sér föt sem passa.
„Það virkilega opnaði augu mín fyrir þörfinni á sérhönnuðum fötum, ekki bara fyrir son minn heldur líka milljónir manna um allan heim með einhverskonar fötlun,“ segir Mindy um það hvernig samtökin Runway Of Dreams varð til.
Samtökin byggja á þeim grunni að hanna föt fyrir allt mannfólk, sama hvernig líkamsvöxtur þeirra er. Metro greindi frá því að samtökin hanna, senda og styðja við það að breiða boðskap fatalínu sem aðlagast líkamanum.
Um þrjátíu fyrirsætur með mismunandi fötlun gengu á tískusýningunni í fötum sem eru sérstaklega hönnuð til þess að aðlagast líkama fólks með mismunandi fötlun. Fötin voru meðal annars frá hönnuðum Target, Tommy Hilfiger og Nike.
Runway of Dreams er eitt merki þess að tískuiðnaðurinn er loksins að breikka sjóndeildarhringinn og einblínir ekki lengur einungis á hávaxið, hvítt og grannt fólk eins og hefur verið gert svo lengi. Fyrirsæturnar sem tóku þátt í New York tískusýningunni voru um 40% lituð á meðan árið 2015 var litað fólk einungis 21% þátttakenda. Einnig hafa fleiri og fleiri transfyrirsætur skrifað undir samninga við stór tískufyrirtæki að undanförnu.