Svala Björgvinsdóttir, söngkona og listamaður var gestur í hlaðvarpsþættinum Helgarspjallið með Helga Ómars um helgina. Í þættinum fara þau Svala og Helgi um víðan völl og ræða allt milli himins og jarðar. Eitt af þeim umræðuefnum sem tekin eru fyrir í þættinum er útlit söngkonunnar og þær kjaftasögur sem gengið hafa manna á milli um meintar lýtaaðgerðir. Svala vísar ölum slíkum sögum á bug.
Svala hefur verið áberandi í poppsenu þjóðarinnar í langan tíma og gefið frá sér fjölda platna og smáskífna. Svala hefur vakið mikla athygli hér heima og erlendis fyrir tónlist sína, flutning og útgeislun.
„Enginn læknir hér, ég sver. Ég hef aldrei sett neitt í þetta andlit,“ segir Svala í þættinum sem heyra má í heild hér. Svala segist alltaf hafa verið með góða húð og þakkar góðum genum. „Ég er bara mjög heppinn, þetta er bara genatískt í minni fjölskyldu. Konurnar í fjölskyldinni eldast mjög hægt. Þú ættir að sjá ömmu mína sem er 96 ára en lítur út fyrir að vera 72 ára,“ segir hún.
Hún nefnir tvær ástæður fyrir því að hún hafi aldrei farið undir hnífinn. „Ég er bara fátækur listamaður og á ekkert pening til að fara í dýrar meðferðir. Svo er ég líka ógeðslega hrædd við nálar,“ segir Svala.
Hún segir tímann verða að leiða það i ljós hvort hún muni prófa aðgerðir sem þessar þegar hún eldist. „Ég er ekkert að útiloka, það getur vel verið að maður geri það seinna meir.“
